gnovis
Fri Feb 02 20:17:00 CET 2024
Scuele: fin ai 10 di Fevrâr pal sielzi insegnament dal furlan
Udin, ai 2 di Fevrâr - Si sint fevelâ simpri plui dispès dai vantaçs linguistics, cognitîfs e culturâi puartâts di une educazion plurilengâl. Il Friûl, in chest sens, al è un lûc di grandis oportunitâts, in graciis dal insegnament de lenghe furlane a scuele. Une sielte che l’an passât e je stade fate dal 79% des fameis.
Tal moment di notâ i fîs ae scuele de infanzie, ae primarie e ae secondarie di prin grât, fin ai 10 di Fevrâr, i gjenitôrs a podaran sielzi di zovâsi dal insegnament dal furlan par dut il cicli scolastic dai lôr fîs. Il percors didatic al è di almancul 30 oris di studi par an e nol gjave timp a altris materiis. Di fat, la leç e fisse che al sedi inserît tal 20% dal curriculum individuât des scuelis in autonomie. La sielte dai gjenitôrs di zovâsi dal insegnament de lenghe furlane si à di fâ tal moment de iscrizion online sul portâl dal MIUR www.istruzione.it/iscrizionionline (tal câs de scuele primarie e de scuele secondarie di prin grât) o suntun modul di cjarte (tal câs de scuele de infanzie). Si pues contatâ ancje la segretarie de scuele par altris sclariments.
Vê la pussibilitât di imparâ e doprâ plui lenghis par comunicâ (come il talian e il furlan) al è pardabon une ricjece di meti a pro inte vite. Cressi cun plui lenghis za di piçui, di fat, al permet di imparâ in maniere plui facile altris lenghis, tant che l’inglês, ma no dome. Lis provis sientifichis a dimostrin cemût che i fruts bilengâi a cressin cun capacitâts di aprendiment, velocitât di comprension, abilitâts logjichis matematichis e creativis plui altis, e cun di plui, si adatin in maniere plui naturâl ai cambiaments, vint une viertidure mentâl plui largje par chei altris. Po dopo e je ancje la salût dal cerviel: par cui che al fevele plui lenghis, si manten zovin e elastic, intardant i risis di demence e di Alzheimer.
ARC/EP
Tue Jan 23 17:43:00 CET 2024
Fieste de Patrie dal Friûl: publicât bant ARLeF pai ents locâi
Udin, ai 23 di Zenâr - La ARLeF - Agjenzie Regjonâl pe Lenghe Furlane e à publicât un bant par sostignî lis manifestazions culturâls inmaneadis dai ents locâi par celebrâ la date di costituzion dal Stât patriarcjâl furlan, il 3 di Avrîl dal 1077. Pal 2024 la Agjenzie, daûr di chel che e à deliberât la Regjon, e à metût a disposizion 57.500,00 euros.
A podaran vê acès ai fonts i Comuns che a vedin sede legâl intai teritoris des ex provinciis di Gurize, Pordenon, Udin e i siet Comuns furlans de Regjon Venit (Cint, Concuardie, Fossalte, Gruâr, Puart, San Michêl dal Tiliment, Tei).
Il bant – a disposizion sul sît istituzionâl de Agjenzie www.arlef.it – al fisse che a saran finanziadis lis ativitâts indreçadis a valorizâ lis origjins, la culture e la storie di autonomie dal popul furlan. In particolâr: events che a pontin a fâ cognossi e/o aprofondî lis lenghis, la storie e la culture dal Friûl; ma ancje la stampe e difusion di publicazions che a vedin chest stes obietîf; in fin la preparazion di spetacui teatrâi o musicâi in lenghe furlane. A son esclududis lis domandis là che il finanziament domandât al è plui bas di 500,00 euros, e chês là che la spese calcolade amissibil e sedi inferiôr a 555,56 euros.
Lis ativitâts culturâls a podaran jessi inmaneadis di un ent locâl ugnul o di agregazions. Lis domandis a varan di rivâ dentri dai 12 di Fevrâr dal 2024, dome midiant pec ae direzion: arlef@certgov.fvg.it
Par dutis lis informazions sul chest bant, si pues clamâ il numar 0432 555910, o scrivi a: federica.delpino@regione.fvg.it.
ARC/EP
Wed Jan 17 17:32:00 CET 2024
TV: matematiche cjantant par furlan
Numaruts
Udin, ai 17 di Zenâr - Di vinars ai 19 di Zenâr dal 2024 in ogni pontade di “Maman!”, su Telefriuli, al sarà ancje un episodi di “I Numaruts”. La otave edizion de trasmission par fruts in lenghe furlane, risultât di une coproduzion fra la ARLeF - Agjenzie regjonâl pe lenghe furlane e la rêt televisive (in onde fin al mês di Jugn, ducj i vinars aes 18.30 e in repliche di domenie aes 7 e aes 13) e darà acet ancje al gnûf carton animât produsût propit de Agjenzie, su licence di Videoplugger Ltd.
I episodis a vignaran inserîts ancje inte programazion di Telefruts (in onde su la stesse emitente di lunis a joibe aes 16.00) e a son a disposizion ancje sul sît e sul canâl YouTube de ARLeF.
“I Numaruts” a son la version par furlan (cun dopleadure curade dal CSS Teatro stabile di innovazione del Friuli Venezia Giulia, e la traduzion dal Sportel regjonâl pe lenghe furlane de ARLeF) dai “Numberblocks”, un carton de BBC che al à tant che protagoniscj modonuts colorâts che a judaran i plui piçui a imparâ la matematiche, in particolâr lis tabelis des moltiplicazions, cjantant, zuiant e gjoldintse: un supuart didatic pai docents, ma ancje pes fameis.
Il program, che al à la consulence dal National Centre for Excellence in the Teaching of Mathematics - Centri Nazionâl pe Ecelence tal Insegnament de Matematiche, al è stât nomenât par un premi BAFTA te categorie "Aprendiment".
I trente episodis a proponaran storiis là che i numars a vivin piçulis aventuris o situazions pardabon straniis, par esempli la partecipazion a un spetacul, a un conciert rock o un viaç intal spazi.
ARC/EP
Fri Jan 05 11:30:00 CET 2024
Libri: La storie vere di Jack e Bee pe infanzie
Udin, ai 5 di Zenâr - Sabide ai 13 di Zenâr aes 16.30 li de Biblioteche Joppi di Udin, si ten la presentazion e leture animade di “La storie vere di Jack e Bee”, libri par fruts in lenghe furlane publicât in colaborazion cu la ARLeF – Agjenzie regjonâl pe lenghe furlane.
Scrit di Alessandra Guadagnin, al conte di une amicizie speciâl par ricuardâ che crodi in se stes e intai propris siums al è une vore impuartant.
Sabide il test al sarà proponût ai piçui letôrs (etât dai 4 ai 9 agns).
Daspò de leture animade dal libri, une copie e vignarà regalade a ducj i fruts presints, al sarà un laboratori creatîf cu la âf Bee.
Par partecipâ ae iniziative al è ben notâsi dentri di miercus ai 10 di Zenâr telefonant al numar 0432 1743400 o scrivint une e-mail a info@sportelfurlan.eu
ARC/EP
Sun Nov 26 14:05:00 CET 2023
Cunvigne: Uniud e ricuarde amedeo Giacomini
Udin, ai 27 di Novembar - Il Cirf de Universitât dal Friûl al inmanee un event par ricuardâ il scritôr, poete e filolic furlan Amedeo Giacomini.
Miercus ai 29 di Novembar aes 16.00, li dal auditorium de Biblioteche dal Pôl Sientific dal Ateneu si davuelzarà la cunvigne dedicade al leterât nassût a Vildivar, che al è stât tra i protagoniscj plui significatîfs de culture furlane tal ultin cuart dal secul passât, e docent di leterature furlane intal Ateneu udinês.
I intervents di Marco Munaro, Silvia Polo, Stefano Strazzabosco e Gian Mario Villalta a permetaran di cognossi miôr diviers aspiets de sô produzion leterarie, fra chescj il so prin romanç Manovre (1967), lis oparis di poesie Presumût unviâr (1987) e Tal grin di Saturno (1990) e la sô traduzion par furlan dal poemut in dialet venit di Andrea Zanzotto Mistieròi/Mistirùs (1984).
ARC/EP
Thu Nov 16 18:06:00 CET 2023
Arlef: Cisilino, gnûf consei di aministrazion in vore
Udin, ai 16 di Novembar - “Intai ultins agns o vin fat sieltis coragjosis pe tutele de lenghe furlane. Al covente continuâ a lavorâ in cheste direzion, indreçats simpri al futûr”.
Lu à dit Eros Cisilino, confermât ae presidence de Agjenzie regjonâl pe lenghe furlane, in ocasion de prime riunion dal gnûf consei di aministrazion de Arlef, designât intes setemanis passadis de Zonte regjonâl.
A fasin part dal Cda Manlio Boccolini, Michele De Sabata, Paolo Paron, Gabriele Zanello e e il revisôr unic dai conts, Giovanni D’Alì.
“O partirìn di cetant fat – al à dit Cisilino - par olsâ ancjemò di plui intai agns a vignî cuntun gnûf plan gjenerâl di politiche linguistiche. Un dai obietîfs – al à anticipât - al sarà chel di consolidâ ativitâts pai plui zovins”.
ARC/EP
Fri Oct 06 10:53:00 CEST 2023
Suns Europe: ai 14 di Otubar il concierton a Udin
Udin, ai 6 di Otubar - Suns Europe, il festival des arts intes lenghis minorizadis, Suns Europe, al sarà parsore dal palc dal Teatri Gnûf “Giovanni da Udine” cun artiscj e i grups selezionâts par cheste novesime edizion ai 14 di Otubar.
Organizât ogni an de cooperative Informazione Friulana, editore di Radio Onde Furlane – cu la poie finanziarie dal MiC - Ministeri de Culture, de Regjon Autonome Friûl Vignesie Julie e de ARLeF - Agjenzie regjonâl pe lenghe furlane, in colaborazion cun cetancj sogjets publics e privâts – il Festival al larà indevant a menâ in Friûl vie pal mês di Otubar, lis arts intes lenghis minorizadis di Europe.
Dai 6 ai 28 di Otubar a son in calendari apontaments musicâi, presentazions di libris e aprofondiments sul cont dai aspiets linguistics.
«La Regjon Friûl Vignesie Julie e je convinte tal dâ la sô poie al festival Suns Europe dedicât aes cjançons in lenghe minoritarie parcè che al è il spieli de vision stesse de nestre tiere, là che di simpri a vivin adun identitâts diviersis che a fasin de regjon une entitât policentriche che no pues no sposâ une culture pluraliste. Il Friûl Vignesie Julie e je une regjon di confin, espression di une culture di frontiere, o sin usâts a confrontâsi cui contrascj: a son confins tra il dì e la gnot, tra realtât e fantasie, ma la musiche e je un veicul in stât di scjavaçâ ancje i confins fisics e culturâi. Chest al è il spirt dal Friûl Vignesie Julie, une regjon in linie cu la filosofie di un teritori che te storie al à viodût convivi identitâts diferentis e che e podarà lâ dilunc a fâlu ancje in avignî cuntun spirt rignuvît tant che chel proponût di chest festival» al à declarât ilvicepresident de Regjon cun deleghe su la Culture, Mario Anzil.
ARC/EP
Tue Jun 06 21:37:00 CEST 2023
Aclif: gnûf president il syndic di Caprive Daniele Sergon
Udin, ai 6 di Jugn - La Assemblee de Comunitât Linguistiche Furlane e à votât pal rinovament des cjariis. Dopo cuatri agns, il conseîr regjonâl Markus Maurmair al à passât la presidence de ACLIF al sindic di Caprive Daniele Sergon. So vice al sarà il sindic di Merêt di Tombe Claudio Violino. La Comunitât Linguistiche e met adun 138 comuns de regjon là che e je fevelade la lenghe furlane. La date di Jugn no je stade sielte par câs, parcè che al cole l'aniversari de muart dal Beato Bertrando, il plui cognossût dai patriarcjis di Aquilee.
ARC/EP
Mon May 22 19:17:00 CEST 2023
Minorancis: Novelli, no a disparitâts jenfri sloven e furlan
Udin, ai 22 di Mai - "Il patrimoni linguistic de nestre regjon al è ae base de nestre specialitât e nus fâs unics intal panorame european. A son trê minorancis linguistichis: il furlan, il sloven e il todesc. Nol è clâr il criteri secont che il sloven al à in maniere sistematiche un tratament in maniere spropositade miôr a pet dal furlan e al todesc".
Cussì intune note Roberto Novelli, conseîr regjonâl di Fuarce Italie, intal rilevâ che "e je une leç a hoc che e tutele dutis lis minorancis linguistichis e al è stât sotscrit un contrat di servizi che al previôt che une cuote de programazion radiotelevisive e sedi fate in lenghe furlane. Ogni an la Rai e à plui di 12 milions di euros par produsi programs e trasmissions intes lenghis tuteladis: par cuâl motîf un sôl decim secont al è destinât al furlan? La disparitât e risulte clamorose ancje cjapant in considerazion lis oris di messe in
onde: 4517 oris di trasmissions radiofonichis cuintri 150, 208 oris di programs televisîfs cuintri 40. Cemût si sclarissino chescj numars?".
Al zonte Novelli: "O sin devant di une disparitât di tratament enormi e no acetabil. La comunitât furlane e je dal sigûr plui numerose di chê slovene sul nestri teritori. No podìn plui acetâ rispuestis evasivis. Pe minorance slovene e je simpri fieste, ai furlans al tocje tirâ la cengle. Nol va ben. No plui".
ARC/EP
Wed May 03 12:47:00 CEST 2023
Culture: a vicino/lontano lenghis protagonistis cun ARLeF
Culture: a vicino/lontano lenghis protagonistis cun ARLeF
Udin, ai 3 di Mai - Furlan, sart e ebraic. Tal cûr dai doi apontaments che la ARLeF – Agjenzie regjonâl pe lenghe furlane e puartarà a vicino/lontano, vinars ai 5 e domenie ai 7 di Mai, a saran lis lenghis.
La ARLeF cui siei apontaments e ponte la atenzion sul teme dal plurilinguisim ancje inte programazion di vicino/lontano. "S'intelligèntzia de Elias: un caso letterario dalla Sardegna", il prin apontament par cure de ARLeF, al è in program ai 5 di Mai aes 18, tal Salon dal Popul. Al sarà un incuintri su la leterature in lenghe minoritarie tacant de opare che forsit e à cambiât par simpri chê sarde: "S'intelligèntzia de Elias" (Janus 2022) di Giuseppe Corongiu. Al è un zâl distopic ambientât tra il 2030 e il 2038. L’autôr al maravee pe sô maniere moderne di doprâ la lenghe sarde tal frontâ lis tematichis contemporaniis e par une leterature che e cor vie ancje par chei che no son esperts de materie. L’atôr Paolo Mutti al leiarà cualchi toc de opare voltât par furlan intant che l’autôr – scritôr, gjornalist, tradutôr, autôr di cetancj saçs su la difese e la promozion des minorancis linguistichis – al fevelarà cul scritôr furlan Gianluca Franco su lis prospetivis des leteraturis minoritariis, fûr di schemis oleografics e di clichè. A fâ di moderadôr al sarà Gabriele Zanello, docent di leterature furlane te Universitât dal Friûl. Graciis ae colaborazion cul Circolo Sardi “Montanaru” di Udin ae fin dal incuintri e je previodude ancje une cerce di prodots sarts.
De colaborazion tra la ARLeF e la Associazione Italia-Israele di Triest e je nassude invezit la idee dal secont apontament inte suaze di vicino/lontano: "La lingua che visse due volte", in program ai 7 di Mai, aes 10, tal oratori dal Crist. Vie pal incuintri si tornarà a percori il viaç de lenghe ebraiche plen di vicendis di no crodi. Daspò dal salût di Sergio Salerno, vicepresident de Associazione Italia-Israele di Triest, a intervignaran Anna Linda Callow - docente di Lenghe e leterature ebraiche te Universitât Statâl di Milan - e Eliahu Alexander Meloni – che dal 2016 al è Rabin a cjâf de Comunitât Ebraiche di Triest e dal F-VJ – moderâts dal gjornalist Walter Tomada. Dal dialic fra i presints si podarà scuvierzi cemût che ae fin dal secul XIX, dopo cuasi doi milenis di vite, l’ebraic al jere doprât dome par motîfs religjôs o di studi, ma nissun lu fevelave tant che lenghe corinte. Intal 1948, deventât lenghe uficiâl di Israêl, la sô storie e à cjapade une gnove strade. In dì di vuê l’ebraic al è doprât in ducj i cjamps de vite sociâl, in particolâr inte leterature, cun romançs e saçs voltâts in dut il mont.
ARC/EP
Thu Apr 27 16:24:00 CEST 2023
Consei regjonâl: Fedriga al zure in cuatri lenghis, 20 conseîrs par furlan
Il gnûf Consei regjônâl
Udin, ai 26 di Avrîl - E je scomençade inte sede di place Oberdan a Triest la prime sentade de XIII legjislature dal Consei regjonâl dal Friûl Vignesie Julie.
Tra i prins ats de Assemblee, il zurament de bande dai neo-conseîrs regjonâi: in vincj a àn zurât par furlan, un par todesc e un par sloven. Al à zurât ancje il president Massimiliano Fedriga, pronunziant la formule par talian, furlan, sloven e todesc.
Mauro Bordin, de Leghe, al è stât elet president dal Consei regjonâl dilunc de prime sentade de gnove assemblee.
Ai 2 di Mai e je in program une sentade dal Consei là che Fedriga al presentarà lis liniis programatichis dal so mandât.
ARC/EP
Mon Apr 03 11:15:00 CEST 2023
Fieste de Patrie: "Incuintri al doman", online la clip dal Imni
Udin, ai 3 di Avrîl - Ogni an, in ocasion de Fieste de Patrie dal Friûl che si celebre vuê la 46me edizion a Caprive, si pues gjoldi di une gnove version dal Imni uficiâl dal Friûl "Incuintri al doman".
Il video al è stât publicât su lis pagjinis Facebook e Youtube de ARLeF - Agjenzie regjonâl pe lenghe furlane (https://youtu.be/-FkRiIS9hqo) che e à finanziât, adun cu la Regjon Autonome Friûl Vignesie Julie, chest gnûf progjet promovût dal Istitût Ladin Furlan "Pre Checo Placerean".
Il protagonist de clip al è il côr di vôs blancjis "VocinVolo - Ritmea" di Udin, direzût di Lucia Follador, cun musichis scritis di Valter Sivilotti e peraulis di Renato Stroili Gurisatti. Un video cu la regjie firmade di Giorgio Milocco - Quasar.
La Fieste de Patrie dal Friûl e je stade ricognossude de Regjon in forme uficiâl intal 2015, e chest an e sarà organizade dal comun dal Friûl Orientâl, in gracie de poie de Regjon e de ARLeF, in colaborazion cul Istitût Ladin Furlan “Pre Checo Placerean”. E je, e e sarà, ancje intal 2023, la ocasion par celebrâ, in comunitât, i valôrs culturâi e linguistics là che il popul furlan si ricognòs ogni dì e che midiant di chei al aferme la sô identitât. Parcè che la Fieste, di là di ricuardâ lis origjins de Patrie dal Friûl (fondade ai 3 di Avrîl dal 1077), e fâs propit chest, fin de sô prime edizion celebrade a Aquilee intal 1977 su iniziative di pre Checo Placerean (al secul Francesco Placereani): e celebre la identitât dai Furlans, in Patrie e ator pal mont.
ARC/EP
Udin, ai 3 di Avrîl - Ogni an, in ocasion de Fieste de Patrie dal Friûl che si celebre vuê la 46me edizion a Caprive, si pues gjoldi di une gnove version dal Imni uficiâl dal Friûl "Incuintri al doman".
Il video al è stât publicât su lis pagjinis Facebook e Youtube de ARLeF - Agjenzie regjonâl pe lenghe furlane (https://youtu.be/-FkRiIS9hqo) che e à finanziât, adun cu la Regjon Autonome Friûl Vignesie Julie, chest gnûf progjet promovût dal Istitût Ladin Furlan "Pre Checo Placerean".
Il protagonist de clip al è il côr di vôs blancjis "VocinVolo - Ritmea" di Udin, direzût di Lucia Follador, cun musichis scritis di Valter Sivilotti e peraulis di Renato Stroili Gurisatti. Un video cu la regjie firmade di Giorgio Milocco - Quasar.
La Fieste de Patrie dal Friûl e je stade ricognossude de Regjon in forme uficiâl intal 2015, e chest an e sarà organizade dal comun dal Friûl Orientâl, in gracie de poie de Regjon e de ARLeF, in colaborazion cul Istitût Ladin Furlan “Pre Checo Placerean”. E je, e e sarà, ancje intal 2023, la ocasion par celebrâ, in comunitât, i valôrs culturâi e linguistics là che il popul furlan si ricognòs ogni dì e che midiant di chei al aferme la sô identitât. Parcè che la Fieste, di là di ricuardâ lis origjins de Patrie dal Friûl (fondade ai 3 di Avrîl dal 1077), e fâs propit chest, fin de sô prime edizion celebrade a Aquilee intal 1977 su iniziative di pre Checo Placerean (al secul Francesco Placereani): e celebre la identitât dai Furlans, in Patrie e ator pal mont.
ARC/EP
Thu Mar 23 17:17:00 CET 2023
Alpins: ricercje dal Ateneu di Udin su impat de dade
Udin, ai 23 di Març - La Universitât di Udin e à inviât un progjet di ricercje traviers il so dipartiment di Siencis Economichis e Sociâls par stimâ i impats economics, sociâls e ambientâls de dade dongje dai Alpins il prossim Mai. Il studi al sarà fat insiemi cu la Associazion Nazionâl Alpins, che il lôr president Sebastiano Favero al à presentât il progjet insiemi cul retôr Roberto Pinton ae responsabile sientifiche Cristiana Compagno. Inte smire de ricercje i servizis publics, il cumierç, la ristorazion e la impression de citadinance.
ARC/EP